eTwinning-ი 10 წლისაა

 კადეტთა სამხედრო ლიცეუმმა მასწავლებელთა პროფესიული განვითარების ეროვნული ცენტრისაგან პროგრამა eTwinning-თან აქტიური თანამშრომლობისათვის სერტიფიკატი და სიმბოლური საჩუქარი მიიღო.

მასწავლებელთა პროფესიული განვითარების ეროვნული ცენტრისაგან აქტიური თანამშრომლობისათვის სერტიფიკატი მიიღო როგორც ლიცეუმმა, ასევე, ლიცეუმის მასწავლებლებმა: ეკა მურუსიძემ, ბესიკ მაჩიტაძემ, თათია მარდალეიშვილმა და დიანა ბოგვერაძემ.

ლიცეუმის მასწავლებლები 2013 წლიდან არიან ჩართული eTwinning-ის პროგრამაში და აქტიურად ახორციელებენ სხვადასხვა სახის პროექტს. პროექტებს მინიჭებული აქვთ ეროვნული და ევროპული ხარისხის ნიშნები.

კონფერენცია ,,ოქროს რიცხვი - 2023“

 I და II სასწავლო კურსის კადეტებმა მონაწილეობა მიიღეს მოსწავლეთა და მასწავლებელთა ყოველწლიურ კონფერენციაში - ,,ოქროს რიცხვი - 2023“, რომელიც აკაკი წერეთლის სახელმწიფო უნივერსიტეტში გაიმართა. 

ლიცეუმის ,,ნორჩ ქიმიკოსთა კლუბის“ კადეტებმა პოსტერები შექმნეს და სტენდური მოხსენების სახით ხუთი თემა წარადგინეს: ,,ქიმიკოსები გვირჩევენ“, ,,ქიმია სამხედროთათვის“,  ,,ბუნების საოცრება”, ,,საკვები და კალორიები“, ,,ზოგიერთი კარსტული მღვიმის წვეთოვანი წყლის ქიმიური შედგენილობის დადგენა”.  

კონფერენციაზე კადეტთა კლუბის მიერ წარდგენილმა ხუთივე თემამ  მოწონება დაიმსახურა. კადეტებმა ჟიურის რჩეული კლუბის წოდება მოიპოვეს და ორგანიზატორებისგან  სერტიფიკატები გადაეცათ.

კადეტებს ლიცეუმის ქიმიის მასწავლებლები: ეკა მურუსიძე და ნესტან ბანცაძე ხელმძღვანელობდნენ. 

კონფერენცია ,,ოქროს რიცხვი“ ორგანიზებულია საქართველოს პროფესიონალ ქიმიკოსთა ასოციაციის მიერ. იგი მიზნად ისახავს ქიმიის პოპულარიზაციას და აღნიშნული საბუნებისმეტყველო დისციპლინით დაინტერესებულ მოსწავლეთა გამოვლენას.

eTwinning--ის პროექტების პრეზენტაცია და გამოფენა

 კადეტთა სამხედრო ლიცეუმში მასწავლებლებმა და კადეტებმა მიმდინარე სასწავლო წლის განმავლობაში ითვინინგის ფარგლებში განხორციელებული პროექტების პრეზენტაცია და გამოფენა მოაწყვეს.

კადეტებმა გამოფენაზე წარმოადგინეს სხვადასხვა თემატიკის 14 პროექტი. მათ ისაუბრეს თითოეული პროექტის მნიშვნელობასა და მიღწეულ შედეგებზე.

პრეზენტაცია და გამოფენა ლიცეუმის მასწავლებლის ეკა მურუსიძის ორგანიზებით განხორციელდა.

ითვინინგის პროგრამაში კადეტთა სამხედრო ლიცეუმის მასწავლებლები რამდენიმე წელია აქტიურად ახორციელებენ საინტერესო და მრავალფეროვან აქტივობებს. ამჟამად ლიცეუმის 32 მასწავლებელი არის ითვინინგის პროგრამაში ჩართული.

ითვინინგის პროგრამა ონლაინ პლატფორმაა, რომელიც შექმნილია ევროპისა და მისი მეზობელი ქვეყნების სკოლების თანამშრომლობის ხელშესაწყობად. პროგრამა იძლევა შესაძლებლობას სხვადასხვა ქვეყნის მასწავლებლებმა და მოსწავლეებმა განახორციელონ ერთობლივი პროექტები, გაუზიარონ ერთმანეთს იდეები და გამოცდილება.

გასვლითი გაკვეთილი

 მეორე სასწავლო კურსის მეოთხე სასწავლო ჯგუფის კადეტებისათვის გასვლითი გაკვეთილები ჩატარდა აკაკი წერეთლის სახელმწიფო უნივერსიტეტში. 

კადეტებისათვის ქიმიის, ბიოლოგიისა და რობოტექნიკის მასწავლებლებმა განსხვავებულ გარემოში ჩაატარეს გაკვეთილები. 

თავდაპირველად კადეტები ესტუმრნენ აკაკი წერეთლის სახელმწიფო უნივერსიტეტის ქიმიური და გარემოსდაცვითი ტექნოლოგიების დეპარტამენტს, სადაც მასწავლებლებმა ნესტან ბანცაძემ და ეკა მურუსიძემ ჩაატარეს გაკვეთილი თემაზე: „ქიმია მედიცინასა და ფარმაცევტულ საქმიანობაში“. კადეტებმა მონაწილეობა მიიღეს სხვადასხვა სახის ექსპერიმენტებში, ასევე გაეცნენ მედიკამენტების დამზადების ტექნოლოგიას. 

შემდეგი გაკვეთილისათვის კადეტებმა უნივერსიტეტის ზოოლოგიის მუზეუმში გადაინაცვლეს. ბიოლოგიის მასწავლებელმა მზია გურულმა მუზეუმში წარმოდგენილი თვალსაჩინოების დახმარებით განიხილა ევოლუციის ეტაპები. 

მოგვიანებით კადეტებისათვის რობოტექნიკის გაკვეთილი უნივერსიტეტის „FABLAB”-ის ლაბორატორიაში ჩატარდა. მასწავლებელმა გიორგი ჩაჩუამ კადეტებთან ისაუბრა ბიზნესში თანამედროვე ტექნოლოგიების მნიშვნელობაზე. 

ლიცეუმს ჰყავს მაღალკვალიფიციური მასწავლებლები, მათ შორის მენტორი და პროფესორ-მასწავლებლები, რომლებიც სწავლების განსხვავებულ, თანამედროვე მეთოდებს იყენებენ.